Her ḳaçan neyzen-i ‘aşḳ üflese bir dem nāyı
Aña āheng iderüz derd ile hūy u hāyı
Def gibi sīne dögersek nola ey Mevlāyī
Çıḳmazuz dāyireden gerçi olup rüsvāyī
Ḥamduli’llāh ki bulup mertebe-i a‘lāyı
Beklerüz ḫāk-i der-i Ḥażret-i Mevlānāyı

Şükrümüz Ḥaḳḳa budur virdi bize idrāki
Almazuz ‘aynumuza her denī-i ḫāşāki
Ṭavrumuz ‘ālī durur gözlerüz ammā ḫāki
Gün gibi mesken idersek yiridür eflāki
Ḥamduli'llāh ki bulup mertebe-i a‘lāyı
Beklerüz ḫāk-i der-i Ḥażret-i Mevlānāyı

Nola tecrīd oluben terk-i metā‘ eyler isek
Ḫāce-i dehr ile her demde nizā‘ eyler isek
Bizi ‘ayb eylemeñüz zühde vedā‘ eyler isek
Şevḳ ile ẕerre gibi ṭañ mı semā‘ eyler isek
Ḥamduli'llāh ki bulup mertebe-i a‘lāyı
Beklerüz ḫāk-i der-i Ḥażret-i Mevlānāyı

Zāhidā cānumuza ṭa‘nile çaḳmaḳ çaḳma
Baḳup ‘iṣyānumuza nār-ı caḥīme yaḳma
Yüzümüz ḳarasını başumuza tīz ḳaḳma
Himmetüñ gibi bize ṭurmadın alçaḳ baḳma
Ḥamduli'llāh ki bulup mertebe-i a‘lāyı
Beklerüz ḫāk-i der-i Ḥażret-i Mevlānāyı

Bir bölük vālih ü āşüfte vü şeydāyīlerüz
Ṭurmayup devr iderüz ‘ālemi Mevlāyīlerüz
İbn-i vaḳtüz bizi sen ṣanma ki ferdāyīlerüz
Ey Türābī sürerüz pāyine yüz pāyīlerüz
Ḥamduli'llāh ki bulup mertebe-i a‘lāyı
Beklerüz ḫāk-i der-i Ḥażret-i Mevlānāyı





Şairin Adı : » TÜRÂBÎ
Şiirin Ölçüsü : Aruz
Şiir Türü : Muhammes
Kitabın Adı : » EREĞLİLİ TÜRÂBÎ DİVANÇESİ