Gazel (Kimdür ki Esîr Olmadı Şol Zülfile Hâle?)

Kimdür ki esîr olmadı şol zülfile hâle?

Ya cân u dilin virmedi şol hüsn ü cemâle?

 

Vehm eli anun nokta-i mevhûmuna irmez;

Misli bilimin niçe geçe hiç hayâle?

 

Alnına ne benzeye gelür meh be-terâzû,

Ya leblerinün rengine çü mey be-piyâle.

 

Mısr'a şekerî tengi sözi irişeliden,

Teng-i şekeri gör ki niçe girdi çuvale.

 

Nergis ciğeri dâğ durur gözi alından,

Al kana boyandı lebi alıyile lâle.

 

Gül-gûn yüzüne gül özini nisbet idimez;

Her çend hayâdan dökilür üsdine jâle.

 

Ayile güneş devr u teselsül gice gündüz,

Gel devr-i Kamer hâline gör, bah bu muhâle.

 

Tedbîr-i nucûm-i felekî fâide kılmaz;

Şuna ki düşe ukde arasında vebâle.

 

Kaddi sıfatın bâd-ı seher serve iderse,

Lerze düşe endâmına, yaprağını sale.

 

Gözüme tecelli kıl u yüzüni gör anda;

Irmahda göricek ayı ferrûh ola fâle.

 

 

 

Şairin Adı : » Kadı Burhaneddin

Şiirin Ölçüsü : Aruz

Şiir Türü : Genel

Kitabın Adı : » Kadı Burhaneddin Dîvânı'ndan Seçmeler